Når ei bedrift implementerer strategien sin, må ho også endre marknadsstrategi og marknadsplan.

Marknadsstrategi

Marknadsstrategien gjer greie for dei overordna måla bedrifta har for marknadsarbeidet sitt. Denne strategien skal fastsetje marknadsmål og beskrive marknader og målgrupper.

Marknadsmål er som regel konkrete og talfeste. Bedrifta kan til dømes bestemme seg for å auke marknadsdelen sin, auke salet eller auke mengda av produkt.

Som regel ønskjer bedrifta å utvide marknadene og målgruppene sine. Ho kan anten finne heilt nye marknader eller prøve å nå nye segment i dei marknadene ho alt har. Å segmentere vil seie å dele marknaden opp i mindre delar. I digital marknadsføring lagar ein også kundeprofilar, det vil seie tenkte personar som blir brukte til å skreddarsy marknadsføring.

Marknadsplan

Marknadsplanen fortel korleis bedrifta skal nå marknadsmåla sine. Marknadsplanen er delt i marknadsmiks, som handlar om bruk av konkurransemidla (4P), og kampanjeplan, som beskriv tidsplan og aktivitetar.

Vidareutvikling av marknadsplanen er avhengig av kva for ei vekstalternativ som er valt:

• Ved marknadsinntrenging må planen endrast med tanke på å selje meir.
• Ved produktutvikling må ein lage ein ny marknadsplan for det nye produktet.
• Ved marknadsutvikling må planen utvidast til å omfatte dei nye marknadene.
• Ved diversifikasjon må ein lage ein ny plan for nytt produkt i ny marknad.

Konkurransemidla dei 4 P-ane, produkt, pris, påverknad og plassering, må vere tilpassa utviklinga av marknadsplanen.

Produkt

Produkta må vurderast med tanke på livsløp, porteføljestyring og produktutvikling. Livsløpet til produktet viser korleis produktet utviklar seg gjennom fasane introduksjon, vekst, modning og tilbakegang. I introduksjons- og vekstfasen er produktet nytt og krev mykje marknadsføring, mens marknadsføringskostnadene minkar i dei seinare fasane.

BCG-matrisa gjer greie for ulike typar produkt i porteføljen. Ei mjølkeku er eit produkt som har stor marknadsdel i ein stabil marknad, og som derfor krev små marknadsføringsressursar. Ein hund er eit produkt som har ein liten marknadsdel i ein liten marknad, og bør som oftast takast ut av produksjon. Ei stjerne har ein høg marknadsdel i ein veksande marknad og krev relativt store marknadsføringsressursar for å halde ved lag posisjonen sin. Eit spørsmålsteikn har låg marknadsdel i ein veksande marknad, men kan med innsats utvikle seg til ei stjerne.

Produktutvikling kan hovudsakleg skje på to måtar: ved å gi nye eigenskapar til eit produkt eller ved ei produktlinjeutviding. Nye eigenskapar vil seie å endre produktet litt slik at det får lengre levetid. Produktlinjeutviding vil seie å tilby produktet i nye storleikar og nye modellar.

Pris

For å få innpass på marknaden kan ein bruke inntrengingsprising og setje prisen lågt. Men dersom ein ikkje har nokre konkurrentar, kan ein bruke skumme-fløyten-strategien. Da introduserer ein produktet med høg pris, for seinare å setje prisen ned når det kjem konkurrentar.

Påverknad

Påverknad, eller marknadskommunikasjon, er måtar ein informerer om produkta på og motiverer kundane til å kjøpe. Ein kan til dømes ha annonseringskampanjar i ulike medium, gi personlege rabattar, gi lang returfrist eller tilby finansieringsløysingar.

Plassering

Plassering er distribusjon av produkta. Mange bedrifter prøver å auke fortenesta ved å kontrollere alle ledda i verdikjeda: både produksjon, lager, distribusjon og salsstader. I dag er denne verdikjeda ofte global fordi ulike land bidreg med best kompetanse i kvart sitt ledd.

Fleire P-ar

Personale gjeld særleg tenesteytande bedrifter. Systematiske strategiar for rekruttering, opplæring og kompetanseutvikling er viktig for dette konkurransemiddelet.

Prosess og fysisk miljø er også viktig for tenesteytande bedrifter. Det går på gode service- og leveringsrutinar og på lokale, logo og visuell profil.