Marknadsføringsplan
Marknadsføringsplanen, som er eit sentralt styringsdokument i marknadsføringsarbeidet, tek utgangspunkt i forretningsideen og situasjonsanalysen og set fokus på utforming av marknadsmål og marknadsstrategi.
Marknadsmål
Det er viktig at ein set seg mål for kva ein ønskjer å oppnå med etableringa. Dess meir konkret måla er, dess betre utgangspunkt har ein når ein skal planleggje tiltaka for å nå måla. Det er ein god måte å dele måla inn i overordna mål og delmål.
Marknadsstrategi
Ei bedrift må ha ein plan for å nå måla – ein strategi. Val av marknad og verkemiddel som pris, produkt, distribusjonsmåte og påverknadsformer er nokre eksempel på strategiske val.
Verkemiddel
Verkemiddel er dei midla eller moglegheitene bedrifta har for å lykkast på marknaden. Vi skil mellom fire verkemiddel, betre kjende som dei fire p-ane: pris, produkt, plass og påverknad.
Påslagsmetoden
Påslagsmetoden bereknar prisen ut frå innkjøpsprisen og multipliserer denne med ein faktor som skal dekkje alle kostnader og gi ei rimelig forteneste. Faktoren kan vere forskjellig for ulike bransjar og varegrupper. Faktoren føreset at ein har erfaring med at prisen gir tilfredsstillande lønnsemd.
Avansemetoden
Avansemetoden tek utgangspunkt i innkjøpsprisen og legg til direkte kostnader som frakt og assuranse. Summen av innkjøpspris og direkte kostnader kallast inntakskost og viser kva det kostar å få vara inn på lageret. Til inntakskost legg vi avansen som skal dekkje indirekte kostnader som oppstår når vara er kommen til butikken. Avansen skal også gi ei rimeleg forteneste.
Bidragsmetoden
Bidragsmetoden tek utgangspunkt i gjeldande pris på marknaden. Det kan vere ein pris som konkurrentar tek, og som kundane er villige til å betale for gjeldande vare. Det er svært lite ei enkelt bedrift kan gjere med denne marknadsprisen. Bedrifta kan ikkje rekne med å få høgare pris enn konkurrentane sine. Derfor blir spørsmålet om prisen er høg nok til å dekkje kostnadene og få ei viss forteneste.
«Utvida produkt»
Det «utvida produkt» er ein ny trend. I det ligg at kjøparen oppfattar produktet som noko meir enn sjølve den konkrete vara eller tenesta.
Personleg kommunikasjon
Personleg kommunikasjon er det salsarbeidet som skjer auge til auge eller øyre til øyre i ein butikk, på ei varemesse eller ein annan stad der kjøpar og seljar treffer kvarandre. Slik personleg kommunikasjon kan også skje skjerm til skjerm via Internett.
Massekommunikasjon
Massekommunikasjon er ei påverknadsform der seljaren vender seg til «massane» (kjøparane) gjennom eit medium. Dette er i stor grad ein einvegskommunikasjon frå seljar til moglege kjøparar. Bodskapen er standardisert og lik for alle.
